رویداد خبري آژانس په افغانستان کې لومړنۍ دیجټلي خبري آژانس
پاکستاني رسنيو راپور ورکړی، چې د دې هېواد بهرنيو چارو وزارت له افغانستان څخه په يوه ليک کې غوښتنه کړې څو په دغلته مېشت د جېش محمد ډلې مشر مسعود اظهر ونيسي.
د پاکستان جيونيوز ټلوېزيون د دې هېواد د بهرنيو چارو وزارت يوه چارواکي له قوله د نوم نه ښودلو په شرط ويلي، په ليک کې د افغانستان له سرپرست حکومت غوښتل شوي چې دغلته د اظهر د اوسېدو ځای مالوم کړي او په اړه دې يې اسلاماباد ته مالومات ورکړي.
سرچيني زياته کړې، چې د افغانستان بهرنيو چارو وزارت ته په لېږل شوي ليک دا هم ليکل شوي، چې مسعود اظهر ښايي په ننګرهار او يا هم په کونړ ولايت کې مېشت وي.
تر اوسه د پاکستان او افغانستان حکومتونو د دې موضوع په اړه رسمي له رسنيو سره مالومات نه دي شريک کړي.
د مسعود اظهر نوم د ملګرو ملتونو په تور لېسټ کې دی او له همدې کبله کلونه وړاندې د پاکستان پنجاب ايالت په بهاولپور کې په خپل کور کې د پاکستاني ځواکونو له لوري نظربند و او بېرته يې نظربندي ماته شوه.
نوموړی په ۱۹۹۱ زېږديز کال کې د هند مسافر وړونکې يوې الوتکې په تښتولو کې هم پر لاس لرلو تورن دی.
جېش محمد د هند تر واک لاندې کمشير کې فعاله وسلهواله ډله ده او دغلته يې پر هندي ځواکونو ګڼ بريدونه کړي دي. يادې ډلې د ۲۰۱۹ کال په فيبروري کې د هند تر واک لاندې کشمېر په پلوامه سيمه کې پر هندي ځواکونو خونړی موټربم بريد وکړ او د هماغه بريد له امله د پاکستان او هند ترمنځ اړيکي هم تر وروستي حد ترينګلې شوې.
