رویداد خبري آژانس په افغانستان کې لومړنۍ دیجټلي خبري آژانس
امریکايي رسنۍ خبر ورکړی چې د امریکا ولسمشر ډونالډ ټرمپ له خپلو جګپوړو سلاکارانو غوښتي و چې د ایران پر اټومي تاسیساتو د برید په ترسره کولو ورته معلومات ورکړي.
نیویارک ټایمز ورځپاڼې راپور ورکړ چې څه موده وړاندې ټرمپ د خپل مرستیال مایک پینس، د بهرنیو چارو د وزیر مایک پومپیو، د وسله والو ځواکونو د لوی درستیز جنرال مارک میلي په ګډون له خپلو جګپوړو سلاکارانو غوښتي و چې ایا په راتلونکو اونیو کې داسې څه لارې شته چې د ایران پر مهمو اټومي تاسیساتو برید وشي.
د ولسمشر ټرمپ سلاکارانو ورته ویلي چې دا کار دې هیڅ کله هم نه کوي، ځکه د دې حملې په کولو سره ښايي یوه لویه جګړه رامنځته شي.
د راپورونو له مخې ټرمپ د ایران د اټومي پروګرام په اړه د نړیوالې اټومي انرژۍ د ادارې تر رپوټ وروسته دا پوښتنه مطرح کړې چې ایران به د غني شویو یورانیمو زېرمه کولو ته دوام ورکړي.
د امریکايي رسنیو د راپورونو له مخې ډېر حتمال و چې د برید لپاره ښایي د ایران د نتیځ اټومي تاسیسات په نښه شوې وای.
نیویارک ټایمز ورځپاڼې وايي سپینې ماڼۍ په دې اړه له څرګندونو ډډه کوي.
