رویداد خبري آژانس په افغانستان کې لومړنۍ دیجټلي خبري آژانس
په افغانستان کې د ملګرو ملتونو سياسي استازولۍ يا يوناما له شپږم ټولګي د پورته زدهکوونکو نجونو پرمخ د ښوونځيو د بندښت يو کال پوره کېدو په اړه په غبرګون کې، دا کار غموونکی او د شرم وړ بللی دی.
يوناما نن يکشنبه د (وږي په ۲۷مه) خپره کړې اعلاميه کې ويلي، چې د ښوونځيو د بنديدو له امله په اټکليزه توګه يو ميليون هغه نجونې له زدهکړو بې برخې شوي، چې له شپږم ټولګي څخه په پورته ټولګيو کې يې پر زدهکړو بوختې وې.
د اعلاميې له مخې، د نجونو پرمخ د ښوونځيو بندولو پرېکړه د افغانستان له ۱۲ او ۱۸ کلونو تر منځ عمر لرونکې نجوني اغېزمنوي. په اعلاميه کې د ملګرو ملتونو د سياسي استازولۍ يا يوناما سرپرست مارکوس پوټزل له قوله ويل شوي، چې د نجونو پر مخ د ښوونځيو بندول معتبره توجيه نه لري او بندښت يې په نړۍ کې بېساری عمل دی.
نوموړي زياته کړې، چې دا کار په ژوره توګه نجونې او د افغانستان راتلونکی زيانمنوي. د يوناما په اعلاميه کې راغلي، زدهکړې د نجونو او ښځو اساسي حق دی او ترې سرغړونه يې کولی شي، چې حاشيې ته د ياد قشر د ټېل وهلو خطر زيات کړي.
يوناما ويلي، چې د نجونو پر زدهکړو دا بنديز د ژورې اندېښنې خبره ده او دا ډول اقدامات کولی شي، چې افغانان له اساسي ازاديو برخې او د ناامنۍ ترڅنګ يې لوږې، انزوا ته پورې وهي.
يوناما د طالبانو په مشرۍ له سرپرست حکومت په جدي توګه غوښتنه کړې، چې د نجونو پر وړاندې له تبعيضي پاليسيو لاس په سر شي او ژر دې يې پر مخ ټول ښوونځي پرانيزي.
