رویداد خبري آژانس په افغانستان کې لومړنۍ دیجټلي خبري آژانس
د بشري حقونو د څار نړيوالو سازمان مسوولانو په افغانستان کې د طالبانو د بيا واکمنۍ يو کال پوره کېدو ته په غبرګون کې ويلي، چې ياد کال د بشري حقونو د خونديتوب له پلوه په افغانستان کې ناوړه کال و.
د دې سازمان د ښځو برخې مسوولې هيدربار نن دوشنبه د (زمري په ۲۴مه) خپل ټوېټر کې ليکلي، چې په افغانستان کې تېر کال د بشري حقونو په ځانګړې توګه د ښځو او نجونو د حقونو په حصه کې له ناورين ډک و.
نوموړې زياته کړې، دامهال افغانان په حيرانۍ د دې ننداره کوي، چې ايا نړيوال به يې له حقونو دفاع وکړي؟
خو هيدبار د نيوکې په توګه ويلي، د دې لپاره ځواب ښايي دا وي، چې نړۍ ښايي په دې برخه کې ډېر څه ونه کړي.
نن د اګسټ ۱۵مه نېټه ده او ټيک په همدې نېټه د طالبانو اسلامي تحريک ځواکونو پر افغانستان بشپړ کنټرول ترلاسه کړ او په دې توګه يې د محمد اشرف غني په مشرۍ جمهوري نظام له بېخ ونړوه.
