رویداد خبري آژانس په افغانستان کې لومړنۍ دیجټلي خبري آژانس
هند کې ریکارډ په یوه ورځ تر ۶۹ زرو ډېرې پېښې ثبت شوې. له دې سره په دغه هېواد کې پر کورونا د اخته کسانو شمېر درو ميلیونو ته په رسېدو دی.
تر امریکا او برازیل وروسته هند درېيم هېواد دی چې دې وبا ډېر خلک پکې اغېزمن کړي او پر کورونا د اخته کسانو شمېر پکې خورا لوړ شوی دی. دغه هېواد د کوېډ-۱۹ له کبله د مړو شويو کسانو د شمېر د ډېروالي له پلوه هم په نړۍ کې څلورم ځای لري.
د هند د عامې روغتیا وزارت پر خپله ټويټر پاڼه لیکلي چې په تېرو ۲۱ ورځو کې د کوېډ-۱۹ د ډېرو ازموینو یا معاینو کولو او د پراخو روغتیايي خدمتونو د ترسراوي له کبله دا شمېرې ډېرې موندل شوې دي.
په یوه ورځ تر یو ميلیون ډېرې معاینې:
د هند د عامې روغتیا وزارت په خبره، په یوه ورځ کې يې د کورونا تر یو ميلیون ډېر ټېسټونه یا معاینې کړې دي.
‘هند په یوه ورځ کې د کوېډ-۱۹ تر یو میلیون ډېرې معاینې کړې دي. په تېرو ۲۴ ساعتونو کې تر لسو لکو د ډېرو کسانو ازموینه شوې ده.’
په دغه هېواد کې په تېرو ۲۱ ورځو کې په پرله پسې ډول د کورونا د مثبتو پېښو کچه لوړه شوې ده
د مذهبي مراسمو پر مهال سپارښتنې
په هند کې داسې مهال د کورونا د مثبتو پېښو په شمېر کې بېساری زیاتوالی راغلی چې دغه هېواد د یوه مهم مذهبي رسم په درشل کې دی.
د ګنېش چتورتي مراسم هندوان په دې عقیده نمانځي چې وايي، په دې ورځ د دوی خدای ګنېش ځمکې ته راغلی دی.
دغه مراسم د هندوانو له تر ټولو لویو مذهبي مراسمو دي چې دوی يې په ترڅ کې د ګنېش مجسمه په اوبو کې ډوبوي.
په دې ورځ هند کې عمومي رخصتي وي او زرګونه خلک يې د نمانځنې په موخه واټونو ته راوځي.
دا ورځ عموماً د اګست له ۲۲ نېټې پېل او څو ورځې دوام کوي.
د هند په بېلا بېلو ایالتونو کې پر خلکو لارښودونه ويشل شوي چې پکې ورښودل شوي، څنګه په خوندي ډول روغتیايي سپارښتنو ته په پام د ګنېش چتورتي مراسم ونمانځي.
