رویداد خبري آژانس په افغانستان کې لومړنۍ دیجټلي خبري آژانس
هندي رسنيو راپور ورکړی چې د دغه هېواد په سوېلي اندرا پردېش ايالت کې د زياتو اورښتونو له امله سېلابونه راوتلي او خلکو ته يې ځاني زيان هم اړولی دی.
د راپورونو له مخې د تېر جمعې په ورځ په ياد ايالت کې دوه بسونه چې سوارلۍ په کې وې، سېلاب وړي او سيمې ته د ژغورنې عملې له رسېدو او پلټنو وروسته، د يوشمېر کسانو مړي له اوبو را ويستل شوي خو ۱۸ تنه نور لا هم بې درکه دي.
په راپورونو کې د چارواکو په حواله ويل شوي، سيمې ته مرستندوی ټيمونه لېږل شوي دي او له زيانمنو کورنيو سره د مرستې ترڅنګ د هغو کسانو د بيا موندنې په موخه هم هڅې روانې دي، چې سېلابونو وړي او بې درکه دي.
يوه مياشت وړاندې د هند په کرېلا ايالت کې هم د اورښتونو په ترڅ کې سېلابونه راوتلي او د يادو سېلابونو له امله ۴۲ تنه مړه شوي وو.
