رویداد خبري آژانس په افغانستان کې لومړنۍ دیجټلي خبري آژانس
نړيوال بانک خبر ورکړی چې په نږدې راتلونکې کې به افغانستان ته د ۲۸۰ ميليونه ډالرو په اندازه د دغه هېواد د کنګل شوې شتنۍ برخه انتقال شي.
د ياد بانک په خبره، دا پيسې به په افغانستان کې د ماشومانو لپاره د ملګرو ملتونو وجهي صندوق يا يونیسف او د خوړو نړيوال سازمان ته ورکړل شي، څو د بشري ناورين مخنيو په موخه مبارزه پرې وکړي.
په دې اړه خپرو شويو راپورو کې ويل شوي، دغه اندازه پيسې د افغانستان د بيا رغونې وجهي صندوق له کنګل شويو پيسو څخه دي چې نړيوال بانک يې په يوه مياشت کې دننه افغانستان ته د لېږدولو خبره کړې ده.
د يادو ۲۸۰ ميليونه ډالرو له ډلې به ۱۸۰ ميليونه ډالر د خوړو نړيوال سازمان په واک کې ورکړل شي څو دغه سازمان پرې په افغانستان کې د خوړو خونديتوب او د خوراځواکۍ مخه ونيسي.
پاتې ۱۰۰ ميليونه ډالر به د ماشومانو لپاره د ملګرو ملتونو وجهي صندوق يا يونيسف ته ورکړل شي او ماشومانو ته به پرې اړين روغتيايي خدمتونه وړاندې کوي.
