رویداد خبري آژانس په افغانستان کې لومړنۍ دیجټلي خبري آژانس
ټاکل شوې چې نن چهارشنبه د (لړم په ۱۹مه) ګاونډي او د سيمې هېوادونو استازي په نوي ډهلي کې سره جرګه او په افغانستان کې به د موجوده وضعيت په تړاو به بحث وکړي.
پرون سېشنبه يو شمېر هندي رسنيو راپور ورکړی چې په غونډه کې د ګډون په موخه د وربلل شويو هېوادونو استازي نوي ډهلي ته رسيدلي دي.
د راپورنو له مخې، د سيمې هېوادونه به په دې غونډه کې د افغانستان په اړه خپلې پراخېدونکې اندېښنې شريکې او د لېوالتياوو په صورت کې د خپلو راتلونکو اقداماتو په موخه به له يوه او بل سره سلا مشورې وکړي.
د نوي ډهلي په کوربهتوب دې غونډه کې له پاکستان پرته روسيې، ايران، تاجکستان، ازبېکستان، ترکمنستان، قزاقستان او قرغزستان د ګډون کولو ډاډ ورکړی دی.
که څه هم د هند په کوربهتوب د افغانستان په اړه دې غونډې ته د طالبانو استازي نه دي وربلل شوي، خو اسلامي امارت له دې وړاندې تمه ښودلې چې له افغانستان سره د همکاريو په اړه به په کې مثبتې پرېکړې وشي.
له دې سره پرون روسيې اعلان وکړ چې د افغانستان په اړه د ټروېکا هېوادونو راتلونکې ناسته به په نږدې ورځو کې د پاکستان په پلازمېنه اسلاماباد کې ترسره شي او په دې غونډه کې به هم د افغانستان پر هر اړخيز وضعيت بحث وشي.
