رویداد خبري آژانس په افغانستان کې لومړنۍ دیجټلي خبري آژانس
د ننګرهار سیمه ییز چارواکي وایي، چې د دغه ولایت د کوز کونړ ولسوالۍ اړوند کونړ سیند کې د یوې ۱۷ کسیزه کښتۍ ډوبېدلو له امله د ښځو او ماشومانو په ګډون ۸ کسان مړه شوي دي.
د ننګرهار د اطلاعاتو او کلتور ریاست د اطلاعاتو امر صدیق الله قریشي ویلي، دا پېښه (دوشنبې، د تلې ۹مه) مازیګر ناوخته د کوز کونړ ولسوالۍ اړوند کاشکوټونو او سربند سیمه کې هغه مهال رامنځته شوې، چې په یوې کښتۍ کې ۱۷ کسان سپاره وو او غوښتل د سیند له یوې غاړې بل لور ته واړوي چې پر همدې مهال د تېز باد له کبله کښتۍ اوبو ډوبه کړې ده.
د نوموړي د معلوماتو له مخې چې له سيند څخه نهه کسان ژوندي او د يوې مېرمنې په ګډون د څلور کسانو جسدونه ايستل شوي دي او د يوې ماشومې په ګډون د څلور کسانو جسدونه لا تر اوسه ورک دي.
د یادولو ده، چې له دې څه موده وړاندې د ننګرهار په مومندرې ولسوالۍ کې هم په سيند کې د يوې جنراتوري کښتۍ د ډوبېدلو له امله شل کسانو خپل ژوند له لاسه ورکړی وو.
