رویداد خبري آژانس په افغانستان کې لومړنۍ دیجټلي خبري آژانس
ناروي هغه ۱۵ روسي دیپلوماتان شړلي چې د جاسوسۍ تور پرې لګېدلی و.
د ناروې د بهرنیو چارو وزیرې انیکن هویتفلد ویلي، مسکو ته به اجازه ور نه کړي چې خپل سفارت د “پټو استخباراتي فعالیتونو” لپاره وکاروي.
د ټاس په نامه د روسیې خبري اژانس ویلي، کرملین به دې پېښې ته “مناسب” ځواب ووايي.
د ناروې دولت په یوه خبرپاڼه کې راغلي چې، چارواکو یې “د وخت په تېرېدو سره” دغه کسان څارل.
خبرپاڼه کې د یادو کسانو د ادعا شویو فعالیتونو په اړه نور جزیات نه دي ورکړل شوي خو پکې ویل شوي چې: “دوی باید ژر تر ژره له هېواده ووځي.”
ناروې وايي، روسیه هغه “ستر استخباراتي ګواښ” دی چې، دا هېواد ورسره مخ دی او دا د ټولې اروپا لپاره مخ پر زیاتېدونکی ګواښ دی.
ناروې روسیې سره په شمالي قطب کې ۱۹۷ کیلو متره ګډه پوله لري چې د اوکرایین کړکېچ په اوږدو کی یې اړیکې ترینګلي شوي.
سره له دې چې ناروې د اروپايي ټولنې غړې نه ده، خو پر روسیې یې یو شمېر بندیزونه لګولي دي.
