رویداد خبري آژانس په افغانستان کې لومړنۍ دیجټلي خبري آژانس
د ملګرو ملتونو د کډوالو عالي کميشنرۍ يا UNHCR په خپل تازه راپور کې په نړيواله کچه د کډوالۍ هغه شمېرې خپرې کړې، چې د افغانستان او اوکراين په شمول له يو شمېر هېوادونو نورو هغو ته کډوال شوي دي.
په دې راپور کې چې نن دوشنبه د (غبرګولي په ۲مه) خپور شوی راغلي، چې دامهال په نړۍ کې د کډوالو شمېر ۱۰۰ ميليونه کسانو ته رسېدلی او د کډوالو دا شمېرې خورا بې مخينې دي.
د ملګرو ملتونو د کډوالو عالي کمېشنرۍ د مالوماتو له مخې، د تېر ۲۰۲۱ زېږديز کال په وروستيو کې په نړيواله کچه د کډوالو شمېر ۹۰ ميليونه کسان وو؛ خو د افغانستان په شمول په اوکراين، اېتوپيا، بورکينافاسو، ميانمار، نېجيريا او کانګو کې د جګړې او دغه راز د بشري حقونو د نقض له امله کډوالۍ ته د خلکو اړ کيدو، دغه شمېر خورا لوړ او تر سل ميليونه کسانو يې ورساوه.
د يادې ادارې شمېرې ښيي، چې په وروستيو کې د اوکراين جګړې له امله يوازې له دې هېواد څخه ۶ ميليون اوکراينيان نورو هېوادونو ته کډوال شوي دي.
په راپور کې د ملګرو ملتونو د کډوالو چارو عالي کمېشنر فليپو ګراندي له قوله ويل شوي، د اوکراين جګړې له امله د کډوالۍ سېل ته د نړيوالو ځواب مثبت و؛ خو زياتوي چې په ګڼو هېوادونو کې وضعيت ته په پام سره بشري مرستې د دې جوګه نه شي کېدای، چې د کډوالۍ مخه ډپ کړي.
ګراندي په هغو هېوادونو کې چې عملا جګړه په کې دوام لري، د سولې او ثبات د تحکيم ترڅنګ د بشري حقونو د رعايت غوښتنه هم کړې، څو د نوموړي په خبره له دې زيات عام بېګناه خلک کډوالۍ ته مجبور نه شي.
د ملګرو ملتونو دغه راپور داسې مهال خپرېږي، چې په افغانستان کې د بشري او اقتصادي وضعيت خرابوالي له امله اوس هم ډېری افغانان بهر ته د تګ په هڅه کې دي.
