رویداد خبري آژانس په افغانستان کې لومړنۍ دیجټلي خبري آژانس
ملګري ملتونه وايي چې په افغانستان کې د طالبانو اسلامي تحريک له واک ته رسېدو سره سم، له دې هېواد سره د ملګرو ملتونو غړيو هېوادونو له لوري د شوې ۱.۲ ميليارد ډالرو بشري مرستې څخه يې، يوازې ۱۳۵ ميليون ډالر ترلاسه کړې دي.
دې سازمان په افغانستان کې بشري وضعيت د اندېښنې وړ بللی او پر مرسته کوونکو هېوادونو يې غږ کړی، څو ژر د خپل لوري اعلان کړې مرستې د ملګرو ملتونو د وګړو صندوق ته وسپاري.
د ملګرو ملتونو د وګړو صندوق مشرې ناتاليا کانم په افغانستان کې د بشري وضعيت په اړه د اندېښنې ترڅنګ ويلي، د دې احتمال شته چې په نږدې راتلونکي کې افغانستان قحطۍ له خطر سره مخ شي.
نوموړي له فرانس پرېس اژانس سره په خبرو کې زياته کړې، د ژمي په را نږدې کېدو او د طالبانو لنډمهالي حکومت د تشکيلاتو مبهم څرنګوالی چې ټولې عامه چارې يې ټکنۍ کړې، د دې سبب شوي چې افغانستان د قحطۍ له خطر سره مخ کړي او په خبره يې ارزونې ښيي چې دا قحطي ښايي د افغانستان يو پر درې برخه وګړي اغيزمن کړي.
په ورته وخت کې مېرمن کانم دا هم ويلي، په افغانستان کې د خوړو او روغتيايي توکو د کموالي په اړه د ملګرو ملتونو اندېښنې لا هم پر خپل ځای دی.
دا په داسې حال کې ده چې تازه د سره صليب نړيوالې ادارې هم د لوږې، وچکالۍ، داخلي بېځايه کېدو او دغه راز د خراب اقتصادي وضعيت له امله د لسګونه زره افغانانو د بيا ګډوالېدو خبرداری ورکړی دی.
