رویداد خبري آژانس په افغانستان کې لومړنۍ دیجټلي خبري آژانس
ملګرو ملتونو د اېتوپيا شمال په ټيګري ولايت کې قحطۍ او لوږې په اړه ژوره اندېښنه ښودلې او ويلي يې دي، د دغه سازمان موندنې ښيي چې په ټيګري کې ۳۰زره ماشومان له شديدې لوږې سره مخ دي.
د ماشومانو لپاره د ملګرو ملتونو صدوق وياند جېمز اېلډر پرون د جمعې په ورځ د (غبرګولي ۲۱مه نېټه) ويلي، د رامنځته شوې شديدې لوږې له امله د ياد شمېر ماشومان ژوند د مرګ له ګواښ سره مخ دی.
که څه هم ټیګري ته د مرستو رسېدو راپورونه ورکړل شوي، خو د ماشومانو لپاره د ملګرو ملتونو د صندوق وياند خبردارئ ورکوي چې يادې سيمې ته بايد په ګډه بشري مرستې ورسول شي، څو په خبره يې د احتمالي رامنځته کېدونکي ناورين مخنيوی وشي.
له دې څو ورځې وړاندې ملګرو ملتونو د يوه راپور په خپرولو سره داسې اټکل کړې و چې ښايي د راتلونکي جولای او سيپټمبر تر مياشتو په ټيګري تر ۴۰۰زرو خلک له سختې لوږې سره مخ شي.
دا ناورين وروسته تر هغې رامنځته شوی چې د اېتوپيا ځواکونو په ټيګري چې د بېلتونپالو پر وړاندې عمليات پيل کړي او لا هم دوام لري.
