رویداد خبري آژانس په افغانستان کې لومړنۍ دیجټلي خبري آژانس
فرانس پرېس خبري اژانس د ځينو سرچينو له قوله راپور ورکړی، چې افغانستان به د ملګرو ملتونو عمومي مجع هغه پرېکړهليک ته مثبته رايه ورکړي، چې په کې پر اوکراين د روسيې بريد غندل شوی دی.
د راپور له مخې په ملګرو ملتونو کې د افغانستان استازي ترڅنګ د ميانمار استازی هم غواړي چې د ملګرو ملتونو د عمومي مجمع دې پرېکړهليک ته مثبته رايه وکاروي.
پرانس پرېس اژانس چې د ياد پرېکړهليک يوې کاپۍ ته يې لاسرسی پيدا کړی ويلي، په دې پرېکړه ليک پر اوکراين د برېد ترڅنګ د روسيې هستوي ځواکونو ته د تيارسئ امر هم غندل شوی دی او له روسيې غوښتل شوي چې له اوکراين څخه خپلو ځواکونو په ايستلو سره، د دې هېواد خپلواکۍ ته درناوی وکړي.
په راپور کې ويل شوي، په ملګرو ملتونو کې د افغانستان او ميانمار استازي داسې مهال د روسيې خلاف پرېکړهليک ته مثبته رايه کاروي، چې د اوسنيو واکمنانو استازولي نه کوي او د يادو هېوادونو د پرځول شوو حکومتونو استازي دي.
له دې وړاندې اسلامي امارت د اوکراين او روسيې په قضيه کې خپله بې طرفي په ډاګه کړې او ويلي يې دي چې ياد هېوادونه دې د تاوتريخوالي پر ځای د خبرو له لارې د ستونزې غوټه په ګوتو خلاصه کړي.
