رویداد خبري آژانس په افغانستان کې لومړنۍ دیجټلي خبري آژانس
ملګرو ملتونو خبر ورکړی چې د دې سازمان عمومي منشي انتونيو ګوټريش افغانستان ته مارکس پوټزل د خپل ځانګړي استازي د مرستيال په توګه ټاکلی دی.
مارکس پوټزل له ۲۰۱۷ تر ۲۰۲۱ زېږديز کال پورې د افغانستان او پاکستان لپاره د جرمني ځانګړی استازی و او له دې وړاندې يې بيا په افغانستان کې د جرمني د سفير په توګه دنده ترسره کړې ده.
نوموړی داسې مهال په افغانستان کې د ملګرو ملتونو د ځانګړي استازي مرستيال په توګه ټاکل کېږي، چې د افغانستان لپاره د نوموړي سازمان ځانګړې استازې ډيبورا لاينز د کاري ماموريت دوره پای ته رسېدلې ده.
په ورته وخت کې د چارو يو شمېر شنونکي هيله مند دي، چې د افغانستان په مسايلو کې د مارکس پوټزل تجربو ته په پام سره به نوموړی ملګري ملتونه له افغانستان سره پر واقعيتونو ولاړې همکارۍ ته وهڅوي.
