رویداد خبري آژانس په افغانستان کې لومړنۍ دیجټلي خبري آژانس
ملګرو ملتونو پرون چهارشنبه د (غويي په ۲۱مه) د يوې اعلاميې په خپرولو سره د فلسطين په لوېديځه غاړه کې د الجزېرې خبريالې شيرين ابو عاقلي وژل کېدل خواشينوونکي بللي او په دې اړه يې د څېړنو غوښتنه کړې.
ملګرو ملتونو د جګړې په سيمه کې د خبريالانو او د رسنيو کارکوونکو وژل د نړيوالو اصولو نقض بللی او ويلي يې دي چې د الجزيزې خبريالې د وژلو په اړه د څېړنو په رڼا کې دې، د دې جرم عاملان عدالت ته راکش شي.
دې سازمان په خپله اعلاميه کې زيات کړې، چې مسوولې ادارې بايد د خبريالانو د خونديتوب په اړه عامه پوهاوی نور هم زيات کړي.
شرين ابو عاقلي پرون په لوېديځه غاړه کې د اسرائيلي ځواکونو د عملياتو خبري پوښښ په موخه د يادو ځواکونو په ډزو کې ووژل شوه او د هغې يو بل همکار په دې پېښه کې ټپي شوی دی.
