رویداد خبري آژانس په افغانستان کې لومړنۍ دیجټلي خبري آژانس
د ملګرو ملتونو امنيت شورا د کندز ښار اړوند په سېداباد جومات کې شوې چاودنه غندلې او ټينګار يې کړی چې د يادې پېښې عاملان بايد ژر تر ژره تشخيص او د قانون منګولو ته دې وسپارل شي.
دې شورا په کندز کې ياد بريد چې شاوخوا ۱۵۰ تنو ته يې مرګ ژوبله واړوله، پر مذهبي لږګيو بريد بللی چې د تېر بريدونو په تعقيب ترسره کېږي.
د ملګرو ملتونو امنيت شورا په دې اړه د يوې اعلاميې په خپرولو سره ويلي، ترهګري په هر نوم او ځای کې د نړيوال امنيت او ثبات لپاره ګواښ دی چې ټول هېوادونه يې بايد په ګډه پر وړاندې ودرېږي.
په اعلاميې کې دغه راز ټينګار شوی چې هېوادونه دې په ټوله مانا د هغو تهديدونو پر وړاندې د نړيوالو بشري حقونو او کډوالۍ قوانينو په پام کې نيولو سره مبارزه وکړي، چې د ترهګرۍ له امله رامنځته کېږي.
له دې وړاندې د امريکا په شمول ګڼو نورو هېوادونو هم د کندز ښار اړوند جامع جومات کې د جمعې لمانځه پرمهال شوې چاودنه غندلې او دا يې د ټولو اصولو خلاف عمل بللی دی.
