د افغانستان بهرنيو چارو وزارت خبر ورکړی چې په مسکو کې د افغانستان سفارت پرون شنبه د (وري په ۲۰مه) رسما نوي ګمارل شوي ډيپلوماټ ته وسپارل شو.
بهرنيو چارو وزارت په دې اړه خپره کړې اعلاميه کې دا ګام د روسيې او افغانستان ترمنځ د ډيپلوماټيکو اړيکو پراختيا او ټينګښت ته د زمينې په برابرولو کې مثبت بللی دی.
په اعلاميه کې زیاته شوې، چې اسلامي امارت حق لري څو له هېواد دباندي د افغانستان ټولې سياسي استازولۍ مديريت او کنټرول کړي.
دا کار وروسته له هغې کېږي چې تېره اوونۍ روسيې د اسلامي امارت له لوري مسکو ته د لېږل شوي يوه ډيپلوماټ باورليک ومانه. که څه هم روسيې تر اوسه په دې اړه څه نه دي ويلي؛ خو له دې وړاندې يې له طالبانو سره د سياسي اړيکو لرلو په موخه شين څراغ ښودلی.