رویداد خبري آژانس په افغانستان کې لومړنۍ دیجټلي خبري آژانس
د کاناډا يوې محکمې د خپلې تازه پرېکړې پر بنسټ د ايران له دولت غوښتي چې په ۲۰۲۰ زېږديز کال کې د اوکراينۍ الوتکې د نسکورولو په پېښه کې دې د وژل شويو ۶ کاناډايانو خپلوانو ته غرامت ورکړي.
محکمې د ايران له دولت غوښتي چې د يادو کسانو خپلوانو ته بايد لږ تر لږه ۱۰۷ ميليونه کاناډايي ډالر چې د ۸۴ ميليونه امريکايي ډالرو معادل کېږي، د غرامت په توګه ورکړل شي.
د يادو وژل شويو کسانو خپلوانو د ايران هغو کسانو په اړه په کاناډا کې محکمې ته عريضه کړې وه، چې د اوکراينۍ الوتکې د نسکورولو په پېښه کې ښکېل بللي شوي وو.
د اوکراين پي اېس ۷۵۲ ډوله الوتکه په ۲۰۲۰ زېږديز کال کې هغه مهال د ايراني ځواکونو له لوري په توغندي ووېشتل شوه چې د تهران له هوايي ډګر د پورته کېدو په حال کې وه.
په دې پېښه کې د ۵۵ کاناډايانو په شمول د بېلابېلو هېوادونو ۱۷۶ وګړي ووژل شول.
