رویداد خبري آژانس په افغانستان کې لومړنۍ دیجټلي خبري آژانس
د سرپرست حکومت وياند ذبيحالله مجاهد چې تازه د ترکيې له سفر څخه هېواد ته را ستون شوی وايي، په دوحې کې له امريکا سره د لوړې کچې نوي مذاکرات نه دي پيل شوي.
نوموړي چې نن شنبه د (لړم په ۱۴مه) خبري کنفرانس ته د خپل سفر د لاسته راوړنو په اړه مالومات وړاندې کول وايي، وخت ناوخت د افغانستان او امريکا د استازو ترمنځ مذاکرات کېږي؛ خو زياتوي چې دا مذاکرات د لوړې کچې نه دي.
د مجاهد په خبره، له هېواد څخه دباندې د افغانستان ناسم انځور نړۍ ته وړاندې شوی او زياتوي چې د دې ناسم انځور له امله نړيوال فکر کوي، چې په افغانستان کې ناامني زياته او دغه هېواد د نشهيي توکو د توليد عمده مرکز دی.
هغه وايي، چې ترکيې ته د سفر پرمهال يې د دې هېواد په ۴ ولايتونو کې له پانګوالو او صنعتکارانو سره ناستې کړي او زياتوي چې په يادو ناستو کې يې ياد پانګوال او صنعتکاران د افغانستان په کانونو، د کرنې په ميکانيزه کولو او نورو برخو کې پانګونې ته هڅولي.
مجاهد په تخنيکي برخه کې د متخصصانو روزنه او جلبول اړين بولي او زياتوي چې په دې موخه يې په ترکيې کې د ليدنو پرمهال متخصاصان قانع کړي، چې بانکوالۍ، پانګونې، د برېښنا په توليد او دغه راز د محصولاتو د پروسيس په برخه کې له افغانستان همکاري وکړي.
ذبيحالله مجاهد يو وار بيا د سرپرست حکومت رسميت پېژندنه د ملګرو ملتونو پر ملحوزات او دغه راز له امريکا سره د هېوادونو پر نزاکتونو پورې تړي.
د هغه په خبره، که څه هم حکومت په رسميت نه دی پېژندل شوی خو په خبره دامهال له هېوادونو سره د افغانستان ټول تعاملات رسمي دي.
