رویداد خبري آژانس په افغانستان کې لومړنۍ دیجټلي خبري آژانس
په چين کې د افغانستان په تړاو د ګاونډيو هېوادونو غونډې په څنډه کې نن چهارشنبه د (وري په ۱۰مه) د افغانستان، پاکستان او چین د بهرنیو چارو وزیرانو درې اړخيزه ناسته کړې.
د بهرنيو چارو وزارت وياند عبدالقهار بلخي په دې اړه خپل ټوېټر کې د بهرنيو چارو سرپرست وزير له قوله ليکلي، چې نوموړي په ياده غونډه کې د درېواړو هېوادونو ترمنځ پر متقابلو همکاريو ټينګار کړی.
متقي زياته کړې، چې افغانستان د چین يوې لارې او کمربند له سترې پروژې ملاتړ کوي او لېوال دی چې د دې پروژې له لارې په سیمهييز پيوستون کې ګټور رول ولوبوي.
له دې سره د چین بهرنیو چارو وزیر وانګ يي د افغانستان، پاکستان او چين ترمنځ د درې اړخيزه غونډو پر دوام ټينګار کړی او لېوالتيا يې ښودلې چې يادې ناستې بايد پر همکاريو متمرکزې وي.
په ورته وخت کې د پاکستان د بهرنیو چارو وزیر شاه محمود قرېشي په دې غونډن کې د بهرنیو چارو وزیرانو په کچه د خبرو اترو پر اړتیا ټینګار کړی او زيات کړې يې ده چې پاکستان به د چین په مرسته د افغانستان په ملاتړ په سيمهييز پيوستون کې ګډې هڅې وکړي.
