رویداد خبري آژانس په افغانستان کې لومړنۍ دیجټلي خبري آژانس
د امريکا مخکينی بهرنیو چارو وزير مايک پمپيو وايي، د جوبايډن په مشرۍ امريکا حکومت په دې هڅه کې دی چې په غير مستقيمه توګه اسرائيلو دې ته وهڅوي، څو د ايران پر وړاندې نظامي اقدام وکړي.
نوموړي چې پرون يې د (تلې په ۲۰مه) د جروسلم پوسټ اسرائيلۍ ورځپاڼې له لوري په رابلل شوي لسم ډيپلوماټيک کنفرانس کې خبرې کولې وويل، د امريکا دغه ډول هڅې کولی شي چې اسرائيلو د ايران پر وړاندې پر نظامي اقدام حتا مجبور کړي.
پمپيو دغه راز د مخکيني ولسمشر ټرمپ له لوري د ايران له اټومي تړون د امريکا له وتلو پرېکړې ننګه کړې او ويلي يې دي چې هغه مهال يې د دې او ورته نورو پرېکړو په کولو سره نړۍ د ايران له تهديد خلاصه کړې وه.
نوموړي زياته کړې چې د ډونالډ ټرمپ په مشرۍ د امريکا حکومت د ايران له لوري نړۍ ته متوجه تهديد کم کړی و، د دغه هېواد د سپاهي پاسداران پر قومندان قاسم سليماني يې بريد وکړ، په سيمه کې يې د امريکا ګټې خوندې کړې او دغه راز يې داسې لار غوره کړه چې له مخې يې ايران د اټومي وسلو څښتن نه شي.
پمپيو زياته کړې، که د ټرمپ حکومت تر دوو کلونو نور هم دوام کړی وی نو د امريکا او سرائيلو ګډه همکاري د دې سبب کېدای شوه چې ايران په بشپړه توګه اټومي وسلو ته د ايران د لاسرسي مخه ډپ کړي.
