رویداد خبري آژانس په افغانستان کې لومړنۍ دیجټلي خبري آژانس
قطر او امريکا تازه په خپلو کې دوې هوکړې لاسليک کړې چې يوه هغه يې قطر پر دې کلف کوي، څو په افغانستان کې د امريکا له ګټو ساتنه وکړي.
د امريکا بهرنيو چارو وزير انټوني بلېنکن په دې اړه ويلي، په ياده هوکړه کې قطر منلې ده چې هېواد به يې په افغانستان کې د امريکا متحده ايالاتو د ګټو د خونديتوب استازولي کوي.
نوموړي زياته کړې، د همکاريو د دې هوکړې له مخې به قطر په افغانستان کې د خپل سفارت يوه برخه د امريکا ګټو ته ځانګړې کوي، څو په خبره يې ځانګړي قونسلي خدمتونه وړاندي کړي او په افغانستان کې د امريکا د ډيپلوماټيکو تاسيساتو د امنيت پر ساتنې څار وکړي.
بلېنکن ويلي چې د دويمې هوکړې له مخې به قطر د هغو افغانانو د سفر چاري تنظيموي چې د امريکا د کډوالۍ وېزو لرونکي وي.
امريکا د تېر اګسټ په ۱۵مه کابل د طالبانو له ننوتلو سره سم په افغانستان کې خپل سفارت وتړه او د افغانانانو لپاره يې ځانګړي سفارتي خدمتونه په قطر کې پيل کړل.
