فلسطیني چارواکي: د غزې بشري وضعیت په کړکېچن حال کې دی

فلسطیني چارواکي وايي، د اسراییلو له لوري غزې ته د توکو ننوتلو د مخنیوي له امله خوراکي توکي کم شوي او بشري وضعیت کړکېچن شوی دی.

چارواکو خبرداری ورکړی، چې په غزه کې خلک د خوړو له کمښت، پاکو اوبو نشتوالي او روغتیايي مرستو ته د نه لاسرسي سره مخ دي.

ورته مهال د ملګرو ملتونو د فلسطیني کډوالو ادارې ویلي، چې د بشري مرستو مخنیوی د خلکو ژوند له ګواښ سره مخ کوي.

بلخوا د ملګرو ملتونو د سرمنشي ویاند، سټیفان دوجارېک له اسراييل و غوښتل چې بشري مرستو ته اجازه ورکړي چې غزې ته ننوځي ځکه هلته څه باندې دوه میلیونه فلسطنیان د خوراکي توکو، درملو او برېښنا له کمښت سره مخ دي.

د ویلو ده چې د اسراييلو لخوا پر غزې د بشري مرستو بندیز نږدې لس ورځې مخکې پیل شوی دی او لا دوام لري.