رویداد خبري آژانس په افغانستان کې لومړنۍ دیجټلي خبري آژانس
د پاکستان مخکيني لومړي وزير او د دې هېواد د تحريک انصاف ګوند مشر عمران خان اعلان کړی، چې د راتلونکې جمعې په ورځ به د شهباز شريف په مشرۍ د اېتلافي حکومت پر ضد له لاهور څخه تر اسلاماباد پورې اعتراضيه تګ پيل کړي.
نوموړي دغه اعلان بېګاه شپه د (لړم په ۳مه) کړی او ويلي يې دي، چې دا اعتراضيه تګ به يې بېساری او خورا پراخ وي.
اسلاماباد ته د اعتراضيه تګ په اړه د عمران خان له اعلان وړاندې د پاکستان حکومتي چارواکو ويلي و، چې نوموړی هڅه کوي څو په پاکستان کې ګډوډي رامنځته کړي؛ خو عمران خان بېګاه دې ادعاوو ته په ځواب کې ويلي، چې د هېڅ ډول ګډوډۍ د رامنځته کولو په هڅه کې نه دی.
د پاکستان کابيني غړي حسن اقبال بيا د نوموړي دې تازه اعلان په غبرګون کې ويلي، چې عمران خان له بهر څخه د پيسو ترلاسه کولو قضيې کې د برئت ترلاسه کولو په موخه لانګ مارچ يا هم اسلاماباد ته د اعتراضيه تګ پيلولو اعلان کړی.
