رویداد خبري آژانس په افغانستان کې لومړنۍ دیجټلي خبري آژانس
د پاکستان يوې حکومتي سرچينې د دغه هېواد ايکسپرېس ټرېبيون ورځپاڼې ته ويلي، ټاکل شوې لومړی وزیر عمران خان بيجينګ ته د خپل سفر پرمهال له چين څخه د ۳ مېليارد ډالري پور غوښتنه هم وکړي.
سرچينو ويلي چې پاکستان دامهال د مالي ذخيرې له کمي سره مخ دی او د دې ذخيرې د پوره کولو په موخه د چين نور اضافي پور ته اړتيا ده.
سرچينې دا هم ويلي، چې د عمران خان له لوري له چين څخه د ۳ مېليارده ډالرو د پور غوښتلو وړانديز پر ترتيب کولو کار روان دی او د پور ترڅنګ به نوموړی له چين دا هم وغواړي چې د پاکستان په بېلابېلو سکټورونو کې پانګونه وکړي.
دامهال پاکستان ۱۱ مېلياده ډالر د چين له لوري پوروړی دی او په تېر مالي کال کې يې چين ته ۲۴ مېليارده کلدارې د هغه ۴.۵ مېليارده ډالرو پور سود ورکړی، چې د سوداګريزو اسانتياوو په موخه ورکړل شوی.
له دې لږ وړاندې پاکستان له سعودي عربستان هم ۳ مېليارد ډالر پور ترلاسه کړی دی. ټاکل شوې چې عمران خان د چين ژمني المپيک سياليو د پرانيستې په مراسمو کې د ګډون په موخه، د فيبروري په ۳يمه بيجينګ ته روان شي.
