رویداد خبري آژانس په افغانستان کې لومړنۍ دیجټلي خبري آژانس
د عراق د روغتیا وزارت چارواکو نن وویل، چې لږ تر لږه اتلس کسان چې ډېره برخه یې ایراني زیارت کوونکي دي د پلازمېنې بغداد په شمال کې د دوو بسونو د ټکر په پېښه کې مړه شوي دي.
فرانس پرس خبري اژانس د یو روغتون د چارواکو له قوله خبر ورکړ، چې په پېښه کې ۱۴ تنه ایرانیان او دوه تنه افغانان مړه شوي دي.
د سرچینې په وینا د پېښې دوه نور قربانیان لا تر اوسه نه دي پېژندل شوي.
د عراق د دولتي خبري اژانس اینا د راپور له مخې، دا پېښه بېګا نیمه شپه د دجیل او سامرا سیمو ترمنځ شوې ده او په ترڅ کې یې پنځلس نور کسان هم ټپیان شوي دي.
هر کال میلیونونه شیعه زیارت کوونکي چې ډېره برخه یې ایرانیان دي، د اربعین په نوم په مذهبي مراسمو کې د ګډون لپاره کربلا ښار ته ځي.
