رویداد خبري آژانس په افغانستان کې لومړنۍ دیجټلي خبري آژانس
د افغانستان بشري حقونو خپلواک کمېسيون مخکينۍ رئيسه شهرزاد اکبر ادعا کوي، چې په افغانستان کې لا هم د ملکي افغانانو ناقونه نيونې، وژل، د تورنو کسانو شکنجه کول دوام لري.
نوموړې نن دوشنبه د (غويي په ۱۹مه) په يو لړ ټوېټونو کې ويلي، چې د اسلامي امارت له لوري د يادو مواردو دوام په جنګي جنايت کې حسابېدای شي.
شهرزاد اکبر ويلي، چې د نړيوالو بشري قوانينو په رڼا کې د ملکي وګړو د هدفي وژنو ترويج، هڅول او يا هم نه مخنيوی، په ناقانونه توګه د دوی نيول او د تورنو کسانو شکنجه کول هغه څه دي، چې د اسلامي امارت رهبرۍ او په ځانګړې توګه نظاميانو ته يې قانوني او جنايي مسووليت متواجه کوي.
شهرزاد اکبر د ملکي وګړو د نيولو او يا هم د تورنو کسانو د شکنجې په اړه تازه او يا هم کره موارد نه دي په ډاګه کړي. د اسلامي امارت مسوولانو د نوموړې دې څرګندونو په اړه تر اوسه رسنيو ته څه نه دي ويلي.
