رویداد خبري آژانس په افغانستان کې لومړنۍ دیجټلي خبري آژانس
په شمالي وزیرستان کې د پاکستاني طالبانو يا تحريک طالبان پاکستان TTP او پاکستاني پوځيانو ترمنځ نښته شوې او په ياده نښته کې د پاکستاني طالبانو ترڅنګ پاکستاني پوځيانو ته هم مرګ ژوبله اوښتې ده.
د پاکستان پوځ هم ياده نښته تائيد کړې او د يوې خبر پاڼې په خپرولو سره يې ويلي، نښته هغه مهال رامنځته شوه چې پوځيان د استخباراتي مالوماتو پر بنسټ د شمالي وزيرستان په سپين وام کې پر عملياتو بوخت وو.
د خبرپاڼې له مخې، په دغه نښته کې يو پوځي او د پاکستاني طالبانو يا تحريک طالبان پاکستان ۲تنه جنګيالي وژل شوي دي.
بلخوا ځايي اوسېدونکي بيا که څه هم د مرګ ژوبلې کره شمېرې نه ښيي خو وايي، چې په ياده نښته کې پاکستاني پوځيانو ته د اعلان شوي شمېر برعکس زياته مرګ ژوبله اوښتې.
په شمالي او جنوبي وزيرستان کې ډېر کله پر پاکستاني پوځيانو وسلهوال بريدونه کېږي. خو د يادو بريدونو پرمهال پوځيان په سيمه کې ګرځبنديز اعلانوي او د تلاشيو په پلمه د خلکو پر کورونو چاپې اچوي.
دې چارې ځايي اوسېدونکي په عذاب کړي او غوښتنه کوي چې د پاکستان پوځ دې د ورته اقداماتو له کولو لاس په سر شي.
