رویداد خبري آژانس په افغانستان کې لومړنۍ دیجټلي خبري آژانس
د سوریې د نوي حکومت چارواکو (دوشنبې، د کب ۲۰مه) د مخکني ولسمشر بشارالاسد د پلویانو په خلاف د نظامي عملیاتو د پایته رسولو اعلان وکړ.
د سوریې د بشري حقونو د څار ادارې د راپور له مخې، د تېرې پنجشنبې په ورځ د نښتو له پیل وروسته، د سوریې د نوي حکومت ځواکونو او په هغې پورې تړلو ډلو پوځي عملیات ترسره کړل. د دې راپور له مخې، امنیتي ځواکونو او د سوریې د نوي حکومت ملاتړ کوونکو جنګیالیو د لاذقیه او طرطوس په ساحلي ولایتونو کې د علوي اقلیت څخه ۱۰۶۸ ملکي وګړي اعدام کړي دي.
د بشري حقونو دغې ادارې، چې په سوریه کې د جګړې او تاوتریخوالي څارنه کوي، ویلي چې وروستۍ پېښې د تېر کال په دسمبر کې د بشارالاسد د رژیم له نسکورېدو وروسته ترټولو بد تاوتریخوالی بلل کېږي.
ورته مهال، د سوریې د پوځ ویاند حسن عبدالغني په یوه اعلامیه کې ویلي چې د دغه هېواد چارواکو هغه پوځي تصفیوي عملیات پای ته رسولي چې د لاذقیه او طرطوس په ساحلي ولایتونو کې د “پخواني رژیم د پاتې شونو” د ګواښ پر وړاندې یې پیل کړي وو.
