رویداد خبري آژانس په افغانستان کې لومړنۍ دیجټلي خبري آژانس
اينډيپېنډنټ ورځپاڼې په نيمروز کې د سرچينو له قوله راپور ورکړی، چې د ايران حکومت د تېرې تلې مياشتې له لومړۍ تر پرون شنبې د (لړم تر اولې) له ۲۰ زرو زيات افغان کډوال له خپلې خاورې په زور ايستلي او بېرته يې افغانستان ته لېږلي دي.
په راپور کې د سرچينو له قوله ويل شوي، چې په دې موده کې په زور د ايران له لوري ۲۳زره ۳۹۹ تنه افغان کډوال يوازې د ورېښم پل له لارې بېرته افغانستان ته ګرځول شوي دي.
د يادو کډوالو له ډلې شاوخوا ۴زره هغه له خپلو کورنيو او پاتې نور يې بيا په انفرادي توګه له ايران څخه شړل شوي دي.
د راپورونو له مخې پر نيمروز سربېره په ورځنۍ توګه د اسلام کلا بندر له لارې هم نږدې ۲زره کسان چې له ايران څخه په زور ايستل کېږي، بېرته خپل هېواد ته ستنېږي.
په نيمروز کې د کډوالو چارو وزارت مسوولانو ويلي، هغه افغانان چې له ايران څخه بېرته خپل هېواد ته ستنېږي، د ملګرو ملتونو د کډوالو عالي کميشنرۍ له لوري ورسره مالي مرسته کېږي.
د ايران حکومت د مالوماتو له مخې، دامهال ۳.۵ ميليونه افغان کډوال د دې هېواد په بېلابېلو ښارونو کې اوسېږي. دوی زياته کړې، په افغانستان کې واک ته د طالبانو له بيا رسېدو سره په ايران کې د مېشتو افغان کډوالو شمېر له ۱.۵ څخه تر اوسنۍ شمېرې پورته شوی دی.
