رویداد خبري آژانس په افغانستان کې لومړنۍ دیجټلي خبري آژانس
د اوکراین ولسمشر، ولادیمیر زلنسکي وايي، که امریکا دغه هېواد ته د پوځي مرستو د استولو ژمنه پوره نه کړي، ځواکونه به یې له روسیې سره له جګړې «ګام په ګام» وتلو ته اړ شي.
زلنسکي په یوه مرکه کې ویلي: “که چیرې د امریکا ملاتړ نه وي، دا په دې مانا ده چې موږ به نور د هوایي دفاع، پیټریوټ توغندیو، د بریښنایي جګړې لپاره تاسیسات او د ۱۵۵ ملي متري توپ مرمۍ ونه لرو.”
هغه زیاته کړې: “دا په دې مانا ده چې موږ به ګام په ګام په کوچنیو موخو کې شاتګ ته اړ شو.”
دا په داسې حال کې ده چې د امریکا د استازو مجلس، د جمهوري غوښتونکو د مخالفت له امله نه دی توانیدلی چې اوکراین ته پوځي مرستې تصویب کړي.
اوکراین له روسیې سره په جګړه کې تر ډېره د امریکا او اروپا پر مالي مرستو او وسلو تکیه کوي.
اوکرایني چارواکو تر دې وړاندې هم څو ځلې له دوی سره د دغو مرستو د نه دوام او د هغو د پایلو په اړه خبرداری ورکړی و.
