رویداد خبري آژانس په افغانستان کې لومړنۍ دیجټلي خبري آژانس
د بشري حقونو او افغان مېرمنو لپاره د امریکا ځانګړې استازې، رینا امیري وایي، چې نړیواله ټولنه د افغان نجونو او ښځو ستونزو رسېدلو ته ژمنه ده.
امیري شنبه د کب ۵مه په خپله اېکس پاڼه د افغانستان په اړه د دوحې ناسته مهمه بللې او زیاته کړې یې ده: “د دوحې ناسته دا ښيي چې نړیواله ټولنه په ټوله کې د افغانستان ملاتړ ته ژمنه ده.”
د امریکا ځانګړې استازې همدارنګه ټینګار کړی چې نړیواله ټولنه د افغان ښځو ستونزو ته د رسېدنې په ګډون د اقتصادي ثبات او امنیت په برخه کې د افغانستان د خلکو ملاتړ ته دوام ورکوي.
رینا امیري د دوحې غونډې ته په اشارې سره ویلي چې په دې غونډه کې د افغانستان د مدني ټولنې استازو له نړیوالې ټولنې غوښتي چې د ښځو غیر عادي وضعیت او د افغانستان په بحثونو کې د ښځو او مدني ټولنې د ونډې اهمیت په پام کې ونیسي.
د یادولو وړ ده چې د افغانستان په اړه د دوحې غونډه تېره اوونۍ د ملګرو ملتونو د سرمنشي په کوربهتوب او د افغانستان په چارو کې د يادو هېوادونو د ځانګړيو استازو په ګډون جوړه شوې وه.
