رویداد خبري آژانس په افغانستان کې لومړنۍ دیجټلي خبري آژانس
د افغانستان لپاره د ملګرو ملتونو ځانګړي راپور ورکوونکي ريچارډ بنت په افغانستان کې د ميرمنو او نجونو پر اوسني وضعيت اندېښنه ښودلې او زياته کړې يې ده چې ياد وضعيت په دې هېواد کې د بشري حقونو پر ټولو برخو سيوری غوړولی.
نوموړي نن شنبه د (غبرګولي په ۲۸مه) خپل ټوېټر کې ليکلي، چې د اروپايي پارلمان د بشري حقونو کميټې ته افغانستان ته د خپل سفر او دغلته د بشري وضعيت په اړه د مالوماتو له ورکولو وړاندې يې، د ياد پارلمان له ځينو غړو سره په دې اړه اندېښنې شريکې کړي دي.
بنت ويلي، چې افغانستان ته د سفر په ترڅ کې د ترلاسه شوو مالوماتو شريک کول او د افغان نجونو او ميرمنو د حقونو اوسني وضعيت په تړاو د اورپايي پارلمان بشري حقونو کميټې ته د مالوماتو ورکول، بروکسېل ته د نوموړي دې سفر د اجنډا په سر کې دي.
د ملګرو ملتونو په شمول د بشري حقونو مدافع نړيوالو بنسټونو هم له دې وړاندې د يو لړ راپورونو په ترڅ کې په افغانستان کې بشري وضعيت خورا اندېښمنوونکی بللی دی.
دوی له اسلامي امارت غوښتي، چې نجونو ته د زدهکړو او ميرمنو د کار حق په ورکولو سره دې، د بشري حقونو خونديتوب ته خپله ژمنتيا ثابته کړي.
