رویداد خبري آژانس په افغانستان کې لومړنۍ دیجټلي خبري آژانس
د کرکټ ۲۰۲۴ کال شل اوریز نړیوال جام په سیالیو کې پرون سېشنبې د جون څلورمه (غبرګولي ۱۵) دوې لوبې وشوې چې یوه یې د متحده ایالاتو د ډالاس په ښار کې او بله یې د وېسټ انډیز په باربیډوس کې وه.
په باربیډوس کې د انګلنډ او سکاټلنډ ترمنځ لوبه د باران له کبله بې پایلې شوه.
سکاټلنډ پچه وګټله او په توپوهنه کې یې په لسو اورونو کې ۹۴ منډې وکړې او هېڅ لوبغاړی یې ونه سوځېد.
لوبه د باران له کبله له اول سره هم ځنډیدلې وه او په منځ کې هم څو ځله باران د لوبې بندېدو لامل شو او بالاخره تر لسو اورونو وروسته د لوبڅارانو پریکړې سره سم لوبه بې پایلې اعلان شوه او دواړو لوبډلو ته یو – یو امتیاز ورکړل شو.
دا په داسې حال کې ده چې په دویمې لوبې کې بیا نیپال د هالنډ لوبډلې ته په ۲۰ اورونو کې یوازې د ۱۰۷ منډو هدف ورکړی و چې هالنډ د لوبې په نولسم اور کې داسې مهال ټاکل شوي هدف ته ځان ورساوه چې څلور لوبغاړي یې سوځیدلي و.
