رویداد خبري آژانس په افغانستان کې لومړنۍ دیجټلي خبري آژانس
د پاکستان د بهرنیو چارو وزارت ویاندې، د ډیورنډ کرښې په اړه د ا.ا د بهرنیو چارو وزارت سیاسي مرستیال، شیرمحمد عباس ستانکزي څرګندونو ته غبرګون ښودلی او هغه یې بېاساسه بللې دي.
ستانکزي په کابل کې د یوې غونډې پر مهال ویلي چې نیمايي افغانستان له ډیورنډ هاخوا دی او د ډیورنډ کرښه د انګلستان لخوا د افغانستان پر خلکو تپل شوې ده.
ښاغلي ستانکزي ټینګار کړی چې ډیورنډ هېڅکله د افغانستان لپاره د منلو نه ده.
بلخوا د پاکستان د بهرنیو چارو وزارت ویاندې، زهرا بلوچ د ښاغلي ستانکزي دا څرګندونې ځانغوښتونکې بللې او رد کړې دي.
هغې ویلي: “چې د ډیورنډ په اړه دا ډول ځانغوښتونکې څرګندونې هېڅکله جغرافیایي واقعیتونه نشي تغییرولی.”
د ویلو ده چې څه موده وړاندې د ا.ا د قومونو او قبایلو چارو سرپرست هم ټینګار کړی و چې افغانستان او پاکستان هېڅ کومه رسمي پوله نه لري.
