رویداد خبري آژانس په افغانستان کې لومړنۍ دیجټلي خبري آژانس
په پاکستان کې د سياسي ناندريو له دوام سره تازه د پاکستان لومړي وزير عمران خان تائيد کړې چې د پوځ له لوري ورته درې وړانديزونه شوي دي.
نوموړي ويلي، چې په دې وړانديزونو کې استعفا ورکول، ژر تر ژره د ټاکنو ترسره کول او يا هم د مخالفو سياسي ګوندونو له لوري په پارلمان کې د بې باورۍ له مقدمې سره مخ کېدل شامل دي.
عمران خان تېره شپه د پاکستان له يوه خصوصي ټلوېزيون سره مرکه کې د پوځ له لوري د يادو وړانديزونو په تړاو ويلي، استعفا ته په هېڅ صورت نه دی راضي؛ خو په خبره يې په بېړه د ټاکنو ترسره کولو ته تيار دی.
نوموړي ويلي، داسې هېڅ کار به ونه کړي چې پر بنسټ يې د پاکستان پوځ کمزوری شي. اوس په پاکستان کې عام ګومان دا دی، چې د دې هېواد پوځ د عمران خان له ملاتړ لاس اخيستی او نوموړی تش لاس په سپين ميدان پاتې دی.
د پاکستان پوځ د دې هېواد په کورني او بهرني سياست کې يوه عمده او پياوړې مهره ده، چې تل له خپل سياسي زور په ګټنې سره دې هېواد کې ملکي حکومتونه په چټکۍ بدلوي.
