د پاکستان په وروستیو لاریونونو کې اته کسان وژل شوي

په پاکستان کې روغتیايي چارواکي وايي،‌ له پرون راهیسې په تاوتریخوالو کې لږ تر لږه اته کسان وژل شوي دي او لسګونه نور ټپیان دي.‌

د پېښور په لیډي ریډینګ روغتون کې ډاکټران وايي،‌ څلور مړي او ۲۷ ټپیان دغه روغتون ور وړل شوي دي.

په لارهور کې هم یو کس په یوه ودانۍ د اورلګېدو له امله مړ شوی دی. په کوټه کې هم د یوه کس د وژل کېدو رپوټونه ورکړل شوي دي.

داسې رپوټونه هم شته چې تر اوسه څه باندې ۱۰۰۰ کسان له تېرې ورځې راهیسې نیول شوي دي.

پرون د بښنې نړیوال سازمان ویلي و چې د نیونو پرمهال له “بشري حقونو سرغړونې شوې دي.”