د پاکستان د سند ایالت له زندانونو څخه ۵۴ افغان کډوال خوشي او هېواد ته راستانه شوي دي.
په کراچۍ ښار کې د افغانستان قونسلي مشر، سید عبدالجبار تخاري وایي چې په خوشي شویو کسانو کې یوولس ماشومان هم شامل دي.
تخاري زیاتوي چې د پاکستان په سند ایالت کې شاوخوا ۵۰ نور افغان کډوال بندیان دي چې د خوشي کولو لپاره یې هڅې روانې دي.
د تخاري په وینا چې کراچۍ ښار کې د افغانستان د قونسلګرۍ په هڅو تر دې دمه د ښځو او ماشومانو په ګډون ۴ زره ۱۱۱ افغان کډوال له زندانونو خوشي او خپل هېواد ته راستانه شوي دي.
بلخوا د پاکستان پولیسو ویلي چې یاد کسان د قانوني اسنادو د نه لرلو له امله نیول شوي دي.
د ویلو ده چې په دې وروستیو کې ډېر شمېر افغانان د قانوني اسنادو په لرلو سربېره بیا هم زنداني شوي دي.