رویداد خبري آژانس په افغانستان کې لومړنۍ دیجټلي خبري آژانس
د پاکستان د ملي امنیت سلاکار موید یوسف ادعا کړې ده چې هند له افغان خاورې څخه وسله وال د ترهګریزو کړنو لپاره پاکستان ته اړوي.
موید یوسف له هندي رسنیو سره په خبرو کې ویلي چې هند باید د نورو په چارو کې له لاسوهنې څخه ډډه وکړي ځکه چې د ده په خبره دا چاره د دواړو هېوادونو اړیکې نورې هم ترینګلې کولی شي.
هغه پر هند تور پورې کړی دی چې ګوندې خپل وګړي افغانستان ته د کار په پلمه استوي خو هغوی ته په پټه دنده ورکړل شوې ده چې ترهګر پاکستان ته واړوي.
نوموړي د دغې ادعا په اړه کوم ثبوت نه دی وړاندې کړی خو ټینګار یې کړی دی چې د هند دا کار اسلام اباد ته د منلو نه دی.
هغه دغه راز د دې پوښتنې په ځواب کې چې که چېرته طالبان په زور واک ته ورسېږي نو د دوی غبرګون به څه وي وویل، دوی په دې اړه د نړیوالې ټولنې تر غبرګون مخکې څه نه شي ویلی.
