رویداد خبري آژانس په افغانستان کې لومړنۍ دیجټلي خبري آژانس
د ډونالډ ټرامپ ټاکنیز ټیم پرون (شنبې، د زمري ۲۰مه) ادعا کړې چې د دې کمپاین یو شمېر کورنۍ اړیکې هېک شوې او دا پېښه یې د ایران کار بللی دی.
د ټرامپ د ټاکنیز کمپاین ویاند، استیون چونګ په یوه بیانیه کې ویلي: “دا اسناد په غیرقانوني توګه لاس ته راغلي او موخه یې د ۲۰۲۴ کال په ټاکنو کې لاسوهنه او د ګډوډۍ رامنځته کول دي.”
دا ادعا له هغې وروسته شوې چې پولیټیکو خبري وېبسایټ په یو راپور کې لیکلي و: “له یو ناپېژانده ادرس څخه مو اېمیلونه تر لاسه کړي چې د ټرامپ د کمپاین اړوند اسناد دي.”
په ورته وخت کې د ټرامپ کمپاین د خپلې ادعا لپاره هېڅ شاهد نه دي وړاندې کړي.
بلخوا ایران په چټکۍ دا ادعا رد کړې او په ملګرو ملتونو کې یې د خپل استازي له لوري اعلان کړی چې د دوی حکومت د امریکا په ټاکنو کې د لاسوهنې لپاره هېڅ موخه او انګیزه نه لري.
د امریکا او ایران دا کړکېچونه د ټرامپ د ولسمشرۍ په دوره کې ډېر شوي وو او د قدس اردو د قومندان، قاسم سلیماني له وژل کېدو وروسته لا زیات شول.
د ویلو ده چې امریکا د ایران اړوند هېکرانو د پيدا کولو پر سر جایزه هم ټاکلې ده.
