رویداد خبري آژانس په افغانستان کې لومړنۍ دیجټلي خبري آژانس
هند کې سیمهییزو چارواکو (شنبې، د لړم ۲۶) ویلي چې په یو روغتون کې د اور لګېدلو له امله ۱۰ نوي زېږېدلي ماشومان مړه شوي او ۳۹ نور ژوندي ژغورل شوي دي.
د چارواکو په وینا، د اور لګېدنې دا پېښه د اترپردیش ایالت په جانسي ښار کې د مهاراني لکشمیبای د طبي پوهنتون د روغتون په نسايي او ولادي څانګه کې د اکسیجن په ماشین کې د خرابوالي له امله رامنځ ته شوې ده.
د طبي پوهنتون مشر ډاکټر نریندر سینګر رسنیو ته وویل: “زموږ له ډېرو هڅو سره سره له بده مرغه لس ماشومان مړه شوي دي.”
د اترپردیش ایالت د وزیر مرستیال براجیش پاټک، د ماشومانو د کورنیو ته د پېښې په تړاو څیړنې ډاډ ورکړ او زیاته کړې ده چې په فبروري میاشت کې د روغتون د خوندیتوب په تړاو پلټنې ترسره شوې او له هغې درې میاشتې وروسته یې په دې روغتون کې د اور وژنې تمرین هم کړی دی.
دا په داسې حال کې ده چې شاوخوا شپږ میاشتې وړاندې د نوي ډهلي د ماشومانو په یو روغتون کې هم د اور لګېدنې له امله شپږ ماشومان مړه شوي دي.
