رویداد خبري آژانس په افغانستان کې لومړنۍ دیجټلي خبري آژانس
د ملګروملتونو پرمختیايي پروګرام «UNDP» خبر ورکړی، چې په افغانستان کې یې په تېرو دریو کلونو کې له ۷۵ زره متشبثو ښځو سره د کار په برخه کې مرسته او د دوی مالي ملاتړ یې کړی دی.
د افغانستان لپاره د یاد پروګرام مشر، سټیفن روډریګز ویلي، له هغه ښځو سره چې دوی مرسته کړې توانېدلې چې د خپلو کورنیو ورځینۍ اړتیاوې تر یوې کچې برابرې کړي.
د هغه په وینا، دا ښځې د خیاطۍ، غالۍ اوبدلو، د خوراکي توکو تولید پروسس او ځینو نورو برخو کې اوسمهال فعالیت لري.
د نوموړي په خبره له دې سربېره یې په بېلا بېلو ولایتونو کې یې لسګونه زره خلکو ته کوچني او متوسط کارو بارونه، سلګونه د اوبو رسولو کانالونه او کاریزونه هم جوړ کړي دي.
بلخوا د صنعت او سوداګرۍ وزارت د معلوماتو پر اساس اوسمهال په کابل ښار او ولایتونو کې شاوخوا ۵۰ زره مېرمنې د چرګانو روزلو، مالدارۍ، خیاطۍ او نورو برخو کې په کار بوختې دي.
