رویداد خبري آژانس په افغانستان کې لومړنۍ دیجټلي خبري آژانس
د غزې د مدني دفاع سازمان پرون شنبې د زمري ۱۳مه په یوه بیانیه کې ویلي چې په غزه کې د اسراییلو لخوا د برید له امله ۱۷ کسان وژل شوي دي.
د دې سازمان ویاند، محمود باسال ویلي چې دا ځای د هغو فلسطینیانو د اوسېدو ځای دی چې د جګړې پرمهال بېځایه شوې دي، خو اسراییلي ځواکونو پر حمامه ښوونځي د برید په تایید ویلي چې دا ځای د «د حماس ترهګرو پټنځای دی» او د حماس لخوا د سلاح جوړولو لپاره ترې ګټه اخیستل کېده.
اسراییلو په وار وار پر حماس تور لګوي چې ملکي تاسیسات یې د مرکزي دفتر په توګه کارولي او یا یې خپل قوماندانان او جنګیالي پټوي، خو حماس تل دا تورونه رد کړي دي.
په ورته وخت کې حماس د شنبې په ورځ اعلان وکړ چې د لوېدیځې غاړې په طولکرم کې د اسراییلو په دوو بریدونو کې نهه فلسطینیان وژل شوي دي.
د اسراییلي پوځ د بیان له مخې، په لومړي برید کې د فلسطیني جنګیالیو یو موټر چې د وسله وال برید پلان یې درلود په نښه کړ.
حماس اعلان کړی چې په دغه برید کې د طولکرم لوا قوماندان وژل شوی او اسلامي جهاد هم ويلي چې څلور نور وژل شوي جنګیالي د دې ډلې غړي وو.
د فلسطین د روغتیا وزارت د راپور له مخې، پر غزې د اسراییلو د بریدونو له پیل راهیسې تر اوسه ۳۹زره ۵۵۰ فلسطینیان وژل شوي او تر ۹۰ زرو ډېر ټپیان شوي دي.
