رویداد خبري آژانس په افغانستان کې لومړنۍ دیجټلي خبري آژانس
د غزې په تړانګه کې پر یوه جومات او یوه ښوونځي د اسراییلي الوتکو په بریدونو کې لږ تر لږه ۲۴ کسان وژل شوي او ۹۳ نور ټپیان شوي دي.
رويټرز خبري اژانس ليکلي، اسرایيلو نن سهار (يکشنبې، د تلې ۱۵مه) په «ديرالبلاح» سيمه کې د يوه جومات او يوه ښوونځي په ګډون دوه ځايونه په نښه کړي دي.
د اسراییلي پوځ ادعا کړې، چې له دغه جومات څخه د اسراییلو پر لور د حماس جنبش د بریدونو د پلانولو او ترسره کولو د مرکز په توګه کار اخیستل کېده.
د اسراییلو په وینا هغه ښوونځی چې برید پری شوی هم په اسراییلي ځواکونو د بریدونو د پلانولو ځای و.
د رویټرز په وینا، دا بریدونه د «الاقصی شهیدانو» روغتون ته نږدې ترسره شوي او د دغو سیمو د بې ځایه شویو وګړو ترمنځ د وېرې او ناامنۍ لامل شوي دي.
دا بریدونه په داسې حال کې کېږي چې د اسراییلو او حماس ترمنځ یو کال جګړه روانه ده، د زرګونو کسانو ژوند یې اخیستی او میلیونونه نور یې بې کوره کړي دي.
