رویداد خبري آژانس په افغانستان کې لومړنۍ دیجټلي خبري آژانس
وروسته له هغې چې د مخالفو سياسي ګوندونو له لوري د پاکستان مخکيني لومړي وزير عمران خان پر ضد د بېباورۍ تحريک بريالی او نوموړی يې له څوکه لرې کړ، اوس تازه د عمران خان په مشرۍ د تحريک انصاف ګوند له پارلمان څخه د استعفا ورکولو خبر ورکړی.
د دې ګوند يوه مشر فواد چودري رسنيو ته ويلي، د تحريک انصاف ګوند غړي به د نوي لومړي وزير له ټاکل کيدو وروسته پارلمان تحريم کړي او په دې توګه به نوو پارلماني ټاکنو ته لار برابره شي.
نوموړي ويلي چې په پاکستان کې د روان سياسي بحران حل يوازې او يوازې د ټاکنو د ترسره کولو له لارې ممکن دی او تشکيلېدونکی حکومت بايد ژر تر ژره ټاکنو ته زمينه برابره کړي.
ټاکل شوې نن ماسپښين د پاکستان پارلمان د دې هېواد نوی لومړی وزير وټاکي. د عمران خان مخالفو سياسي ګوندونو اېتلاف د دې اېتلاف مشر شهباز شريف او د عمران خان په مشرۍ تحريک انصاف ګوند د دې ګوند مرستيال شاه محمود قرېشي د نوماندانو په توګه وړاندې کړي دي.
