رویداد خبري آژانس په افغانستان کې لومړنۍ دیجټلي خبري آژانس
ټاکل شوې، چې د پاکستان د اسلام اباد لوړه محکمه نن د پخواني لومړي وزیر عمران خان لخوا هغه ته د دولتي سوغاتونو قضیه کې د اورول شوې سزا د ځنډېدو غوښتنې په اړه پرېکړه وشي.
د اسلام اباد د لوړې محکمې رییس ‘قاضي عامر فاروق’ په مشرۍ دوه کسیز بورډ پرون دوشنبه د دې قضیې په تړاو د تورونو او ځوابونو د اورېدو پروسې له بشپړېدو وروسته پرېکړه نن ورځې ته وځنډوله.
د یادونې ده چې د اسلام اباد یوې ابتدایي محکمې د اګست پر پنځمه عمران خان د دولتي ډالیو د تفصیلاتو پټولو اړوند قضیه (توشهخانه کېس) کې د مالي فساد ګرم وباله.
محکمې هغه ته د دریو کلونو بند سزا واوروله.
د پنجاب پولیسو د ابتدایي محکمې له دې پرېکړې سملاسي وروسته نوموړی د لاهور په زمان پارک کې له خپل استوګنځي ونیو او دمګړۍ د پنجاب په اټک زندان کې بندي دی.
خو د پاکستان تحریک انصاف ګوند مشر د لومړنۍ محکمې د دې پرېکړې خلاف د اسلام اباد په لوړه محکمه کې د استیناف غوښتنه کړې.
هغه ویلي چې د ابتدايي محکمې پرېکړه دې وځنډول شي.
