رویداد خبري آژانس په افغانستان کې لومړنۍ دیجټلي خبري آژانس
د سوډان لومړي وزير عبدالله حمدوک په دې هېواد کې د واک پر سر د سياسي لانجو او وروستيو لاريونونو له امله پرون يکشنبه ناوخته د (مرغومي په ۱۲مه) د خپلې استعفا اعلان وکړ.
نوموړي د خپلې استعفا د اعلانولو پرمهال وويل، اړتيا ده چې د سياسي اړخونو ترمنځ يوې ملي هوکړې ته د رسېدو لپاره مذاکرات وشي، څو د نوموړي په خبره واک يوه منتخب حکومت ته ولېږدول شي.
حمدوک زياته کړې، اوسنيو سياسي بې ثباتيو ته په پام سره غواړي چې د وضعيت مديريت کولو مسووليت بل وړ کس ته پرېږدي. عبدالله حمدوک د يوې پوځې کودتا په ترڅ کې د سوډان مخکيني ولسمشر عمر البشير له پرځېدو وروسته، په ۲۰۱۹ کال کې د واک د وېش يوې هوکړې په ترڅ کې لومړی وزیر شوی و.
نوموړي ژمنه کړې وه چې تر ۲۰۲۳ زېږديز کال پورې به د ګونديزو ټاکنو له لارې واک يوه منتخب حکومت ته لېږدوي. خو د سوډان د ډيموکراسۍ پلوه غورځنګ له لوري د واک د وېش هوکړې له ماتېدو سره، په سوډان کې سياسي بې ثباتۍ زور وکړ تر دې چې لومړی وزير حمدوک په تېر اکټوبر کې د پوځ له لوري په کور کې نظر بند هم شو.
