رویداد خبري آژانس په افغانستان کې لومړنۍ دیجټلي خبري آژانس
د قرغيزستان او تاجکستان ځواکونو نن چهارشنبه د (وږي په ۲۳مه) په ګډه پوله کې جګړه کړې او پر يوه او بل يې درنې وسلې هم کارولي دي.
د قرغيزيستان د سرحدي ځواکونو له لوري په دې اړه خپره شوې اعلاميه کې ويل شوي، چې د دې هېواد بولاک باشي ولايت په باتکند سرحدي سيمه کې تاجيک سرتېرو سرحدي اصول ماتول او د قرغيزستان له لوري ورته څو ځله خبرداری ورکړل شو، خو د اعلاميې له مخې يادو ځواکونو خبرداري ته پاملرنه ونه کړه او پر قرغيز لوري يې ډزې وکړي.
په اعلاميه کې ويل شوي، چې د جګړې له امله قرغيز ځواکونو ته هېڅ زيان نه دی اوښتی. په اعلاميه کې که څه هم تاجيک سرتېرو ته د مرګ ژوبلې اوښتو ادعا شوې، خو کره شمېر يې نه دی په ډاګه شوی.
په اعلاميه کې ويل شوې چې نښته نن سهار شاوخوا ۹نيمې بجې پيل شوه. بل تاجکستان تر اوسه د يادې جګړې او په کې خپلو سرتېرو د مرګ ژوبلې اوښتو په اړه شوو ادعاوو ته غبرګون نه دی ښودلی.
وخت ناوخت په سرحدي سيمو کې د دواړو هېوادونو ترمنځ وسلهوالې نښتې کېږي. که څه هم د دې نښتو د مخنيوي په موخه د دواړو هېوادونو د چارواکو ترمنځ په تېر کې متعددې ناستې شوي؛ خو پايله يې نه ده ورکړې.
