رویداد خبري آژانس په افغانستان کې لومړنۍ دیجټلي خبري آژانس
د خواف – هرات د اورګاډي پټلۍ د دویم فاز د څلورمې برخې د جوړولو قرارداد په دې وروستیو کې د افغانستان د ریل پټلۍ ادارې او د «ګاما ګروپ» شرکت ترمنځ لاسلیک شوی دی.
د ارګ د یوې اعلامیې له مخې، د دغه فاز کار به، چې ۴۷ کیلومتره اوږدوالی لري، د ۵۳ میلیونه ډالرو په لګښت په راتلونکو دوو کلونو کې بشپړ او ګټې اخیستنې ته وسپارل شي.
ارګ زیاته کړې، چې دا د خواف- هرات د اورګاډي پټلۍ وروستۍ برخه ده، چې افغانستان به د ترکیې له لارې د ایران له مهمو سمندري بندرونو او اروپا سره ونښلوي.
په دې اعلاميه کې ويل شوي چې د خواف – هرات اورګاډي پټلۍ به د منځنۍ او سوېلي اسيا ترمنځ د سوداګريزو توکو د لېږد رالېږد د زياتوالي او همداراز په فراه، نيمروز، هلمند او کندهار ولايتونو کې د اورګاډي د شبکې غځولو ته زمينه برابره کړي.
د اقتصادي چارو کارپوهان وايي، د اورګاډي له لارې د سوداګریزو توکو لېږد په کم لګښت او وخت سره ترسره کېږي، چې د هېواد په بازارونو کې یې د بیې د راټیټېدو لامل کېږي.
